Փոխվել է կլինիկական օրդինատուրա ընդունվելու կարգը

Նոր ուսումնական տարվա նախօրեին կայացած ռեկտորատում քննարկվեցին 2012-13 ուստարվա կլինիկական օրդինատուրայի ընդունելության արդյունքները: Պրոռեկտոր Մհեր Բիշարյանն այս առթիվ ներկայացրեց, որ փոխվել է կլինիկական օրդինատուրա ընդունվելու կարգը, համաձայն որի` ԵՊԲՀ-ն ավարտած ուսանողներն ընդունելության քննություն չեն հանձնում:

Քննություն չեն հանձնում նաև մինչև 3 տարի առաջ ԵՊԲՀ-ն ավարտած շրջանավարտները: Մյուս բուհերի շրջանավարտները պետք է հանձնեն ԵՊԲՀ մագիստրատուրայի ավարտական թեստային միջառարկայական քննությունները: Համակարգչային քննությունների արդյունքում տարբեր բուհեր ավարտած 35 դիմորդներից ԵՊԲՀ-ի կլինիկական օրդինատուրա է ընդունվել 12-ը: Պետական պատվերի շրջանակներում հատկացված 95 տեղից 40-ը մնացել է թափուր: Այդ տեղերը կզբաղեցնեն մարզերում աշխատող այն բժիշկները, ովքեր ցանկանում են վերամասնագիտանալ: Ի դեպ` ԵՊԲՀ-ի շրջանավարտներից 40-ը, այդ թվում` 21 զինվորական բժիշկ, կլինիկական օրդինատուրա են ընդունվել պետպատվերի, իսկ 18-ը` վճարովի համակարգում:

Կկրճատվեն ուսուցման ժամկետները

Ըստ համալսարանի իրավաբանական բաժնի պետ, Մելիք Սողոմոնյանի ներկայացրած «Ուսուցման պայմանագրի» նախագիծի` 4+2, 4+1 պայմանագիրը բխում է բարեփոխումների շրջանակում իրականացվող գործընթացներից, այն է` ՙԲակալավրիատ և մագիստրատուրա՚ ընդհանուր կրթական ծրագրի ներդրում: Բարեփոխումների հետևանքով կկրճատվի նաև ուսուցման ժամկետը մեկ տարով, որը ընդհանուր բժշկություն մասնագիտության համար նախատեսում է 4 տարի` բակալավրիատի, 2 տարի` մագիստրատուրայի ժամկետ, իսկ ստոմատոլոգիա և դեղագիտական մասնագիտությունների համար` 4 տարի` բակալավրիատի և 1 տարի` մագիստրատուրայի ժամկետներ: Նման պայմանագրերը կկնքվեն միայն 2012-13 ուսումնական տարում ընդունվողների հետ: Մյուս կուրսերի ուսանողների հետ արդեն կնքված պայմանագրերը կպահպանվեն մինչև դրանց ժամկետների ավարտը: Սպասվում են այլ փոփոխություններ ևս: Այս մասին մենք կտեղեկացնենք մեր հետագա թողարկումներում: Բանկերի կողմից մեզ կտրամադրվեն պլաստիկ քարտեր` ուսանողների անձնագրային տվյալներով, որոնց վրա կփոխանցվեն թոշակները: Հենց դրանք էլ կլինեն ուսանողական նոր տոմսեր: Սա աշխարհում ընդունված քաղաքակիրթ ձև է, որը միաժամանակ հեշտացնում է հաշվապահության աշխատանքը:

Հարցեր, պատասխաններ, մեկնաբանություններ